Coincidindo co cumprimento neste 2015 do 25 aniversario do Consello Xeral da Cidadanía Española no Exterior (CGCEE), que comezou sendo Consello Xeral da Emigración (CGE), publícase o libro "CGE-CGCEE. 25 PRIMEROS AÑOS". Os dous tomos que o compoñen, con máis de 2.000 páxinas, constitúen unha recompilación de todo o relacionado co CGCEE.

Nel poden seguirse con detalle os debates que tiveron lugar no Consello, pleno por pleno, ata penetrarse no vixente VI Mandato. Tamén as iniciativas que xurdiron das súas formulacións e resolucións noutros foros, como o Parlamento, os Consellos de Residentes Españois e as entidades da emigración.

Preséntase ao organismo e recóllense cuestións como a normativa na que se enmarca, o seu Regulamento e todas as resolucións que o Consello tomou ao longo da súa historia, agrupadas por plenos e comisións.

Contén así mesmo unha longa e detallada relación dos protagonistas -titulares e suplentes no caso dos conselleiros xerais- e acompañantes que tivo o Consello ao longo da súa existencia: presidentes de Goberno, ministros, autoridades do Consello Xeral (presidentes, vicepresidentes, e secretarios), conselleiros xerais elixidos pola Emigración, conselleiros xerais en representación da Administración Central, conselleiros xerais en representación das comunidades autónomas e responsables autonómicos de Emigración que delegaban a súa representación (cando no CGE non estaban todas as comunidades autónomas), conselleiros xerais en representación dos sindicatos, conselleiros xerais en representación das organizacións empresariais, conselleiros xerais en representación das federacións de asociacións de españois no exterior, representantes dos partidos políticos ante o CGE/CGCEE, expertos, observadores e invitados, comparecentes e colaboradores externos, responsables autonómicos e locais que recibiron ou asistiron aos plenos, membros da Administración que asistiron ao CGE/CGCEE nos seus plenos, xornalistas que seguiron os debates, parlamentarios que trataron temas vinculados ao Consello e outros.

Péchase cun álbum con preto de 200 fotos de distintas etapas do organismo. Recollen diversos momentos dos plenos, con intervencións dos conselleiros e das autoridades que participaron (ministros, subsecretarios de ministerios, secretarios de Estado, presidentes de autonomías, representantes de partidos políticos, etc.), debates nos corredores, pousados de grupos e fotos de familia do CGCEE, recepcións dos Reyes Juan Carlos I e Sofía, fotos de familia cos Reyes, fotos de familia cos presidentes do Goberno Felipe González, José María Aznar e José Luis Rodríguez Zapatero, momentos de relax (ceas e actividades especiais como as visitas ao estadio Santiago Bernabéu e ao Instituto Cervantes) e reunións das comisións.

A autora, a xornalista María Luisa Clemente Martín, basea o contido nas actas do Consello, especialmente no que se refire ao I Mandato do Consello, e, fundamentalmente, nas informacións que durante máis de dúas décadas de seguimento continuo realizou como xornalista autónoma ou freelance e publicou no xornal "Galicia en el Mundo" e na web "Crónicas da Emigración", ademais de consultar puntualmente outros medios destinados á emigración.

O seguimento é cronolóxico e faise non só dos plenos ou as comisións senón tamén dos temas importantes que eran obxecto de debate e resolucións por parte do CGCEE e tiñan desenvolvemento nos períodos interplenarios, por parte dos organismos do Estado, por exemplo, e doutro tipo de cuestións externas pero vinculadas ao Consello, como eleccións dos CRE ou o posicionamento das organizacións de emigrantes respecto del. Hai tamén informacións previas aos plenos, que testemuñan o que se esperaba desas reunións. Cada capítulo empeza cun Pleno e péchase coas informacións que anuncian o contido do seguinte.

A publicación contou co respaldo do Ministerio de Emprego e Seguridade Social a través da Secretaría Xeral de Inmigración e Emigración e da Dirección Xeral de Migracións.

María Luisa Clemente Martín (Pescueza, Cáceres) é xornalista. Licenciada en Ciencias da Información, sección Xornalismo, pola Universidade Complutense de Madrid, na que tamén ten realizados estudos de Doutoramento.

Ata o momento, desenvolveu a súa carreira profesional en prensa escrita (xornais, revistas, axencia, webs e Gabinete de Prensa), por conta allea e como. Exerce como xefa de Prensa na Delegación da Xunta de Galicia en Madrid.

Especializada en Emigración, publicou sobre a materia, entre outros sitios, na Rexión Internacional, Galicia no Mundo e a web Crónicas da Emigración. Dentro deste ámbito dedicou especial atención ao Consello Xeral da Cidadanía Española no Exterior: fixo seguimentos puntuais do I Mandato para A Rexión Internacional e, como autónoma, seguiu por completo o resto dos mandatos e actividade do CGE-CGCEE e os seus membros ata o I Pleno de VI Mandato, publicando información e fotografías en Galicia no Mundo e a web Crónicas da Emigración. Asistiu como observadora ao II e ao III Pleno do VI Mandato do CGCEE.

Recibiu a Medalla de Honra da Emigración, na súa categoría de Prata.